Партыя прэзідэнта Польшчы заклікае ўвесці эмбарга супраць уладаў Беларусі

Польскія палітыкі таксама патрабуюць не ўпускаць міністра замежных справаў Беларусі Сяргея Мартынава ў краіну.

Польская апазіцыйная партыя «Права і справядлівасць», якую ўзначальвае Яраслаў Качыньскі, брат-блізнюк прэзідэнта Польшчы Леха Качыньскага, звярнулася да міністра замежных справаў Радаслава Сікорскага з патрабаваннем адмяніць візіт кіраўніка МЗС Беларусі Сяргея Мартынава ў Варшаву, паведамляе ИА REGNUM.

Кіраўнік фракцыі «ПіС» у Сойме Гражына Генсіцка на прэс-канферэнцыі 9 лютага заявіла, што партыя чакае, што міністр замежных справаў Беларусі Сяргей Мартынаў «не будзе ўпушчаны ў Польшчу».

Акрамя гэтага, «ПіС» заклікае прэм'ер-міністра Дональда Туска звярнуцца ў ЕЗ з прапановай аб накладанні на Беларусь гандлёвага эмбарга, перадае агенцтва РАР.

У сваю чаргу міністр замежных справаў Польшчы Радаслаў Сікорскі заяўляе, што не мае намеру адмяняць візіт свайго беларускага калегі Сяргея Мартынава ў Варшаву. Па словах Сікорскага, «з Беларуссю трэба размаўляць, а не ізаляваць яе».

З дапамогай падобнай палітыкі міністр мае намер запэўніць Аляксандра Лукашэнку ў тым, што «ізаляцыя яго краіны не ў яго інтэрасах», перадае «Польскае радыё». Нагадаем, што днямі Cікорскі заявіў, што мае намер паразмаўляць з МЗС Беларусі «па-мужчынску».

Прэзідэнт Польшчы асабіста выступіў з заявай, у якой цалкам падтрымаў Звяз палякаў Беларусі, якім кіруе Анжаліка Борыс, адзначыўшы, што беларускія палякі «увесь час церпяць неабгрунтаваныя рэпрэсіі».

«Павага правоў нацыянальных меншасцяў у сучасным свеце належыць да канону асноўных правоў чалавека. У хуткім часе канцылярыя прэзідэнта Польшчы мае намер запрасіць Борыс і прадстаўнікоў ЗПБ у Варшаву», - кажацца ў заяве Леха Качыньскага.

8 лютага ў Івянцы (Менская вобласць) у Польскі дом, які належыць непрызнанаму ўладамі Звязу палякаў Беларусі, прыйшлі супрацоўнікі міліцыі і судовыя выканаўцы. Судовыя выканаўцы прыступілі да вопісу маёмасці. Сам будынак быў абкружаны міліцыянтамі. Актывістаў непрызнанага Звяза палякаў міліцыянты з будынка выштурхалі. Пасля гэтага яны правялі туды нейкага Станіслава Бурачэўскага, які кіруе мясцовым аддзяленнем альтэрнатыўнага (лаяльнага уладам) Саюза палякаў.

Папярэдні канфлікт вакол Польскага дома ў Івянцы адбыўся ў канцы студзеня. Тады ўлады спрабавалі арганізаваць там з'езд, каб зняць кіраўніка мясцовага аддзялення непрызнанага ЗПБ Тэрэзу Собаль. Дзесяткі актывістаў арганізацыі, якія накіроўваліся ў Івянец, былі затрыманыя.

Саюз палякаў быў расколаты ў 2005 годзе. Частка яго, лаяльная уладам, з'яўляецца афіцыйна прызнанай. Актывісты непрызнанага ЗПБ на чале з Анжалікай Борыс церпяць пераслед з боку ўладаў.

9 лютага паступіла інфармацыя пра тое, што амбасадар Польшчы ў Беларусі Хенрык Літвін адкліканы ў Варшаву ў знак пратэсту супраць пераследу польскай меншасці.